ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງອັດຕະປື ລາຍງານໃຫ້ຮູ້ວ່າ: 8ໂມງເຊົ້າຂອງວັນທີ 29 ກັນຍາ 2022 ນໍ້າເຊກອງ ຢູ່ຈຸດວັດແທກບ້ານ ເວີນແຄນ, ເມືອງສາມັກຄີໄຊ,ແຂວງອັດຕະປື ວັດແທກໄດ້ 16,28 ແມັດ, ເຊິ່ງຈັດຢູ່ໃນລະດັບເຕືອນໄພອັນຕະລາຍ.
ນໍ້າເຊກອງ ລົ້ນຝັ່ງໄຫລເຂົ້າຖ້ວມບ້ານເຮືອນຂອງປະຊາຊົນ ຢູ່ເທສະບານຂອງແຂວງອັດຕະປື ເຊັ່ນ ບ້ານເວີນແຄນ, ບ້ານສະເພົາທອງ, ບ້ານບຸ່ງ, ບ້ານຫຼັກສາມ ແລະ ບ້ານເຊກອງ ຫລາຍຫລັງຄາເຮືອນໄດ້ຮັບຄວາມເສຍຫາຍ.
ແຈ້ງໃຫ້ປະຊາຊົນຫຼາຍຄອບຄົວໄດ້ຮີບຮ້ອນຂົນເຂົ້າຂອງຊັບສິນຍ້າຍໄປໄວໃນບ່ອນພື້ນທີ່ສູງ ແລະ ປັດຈຸບັນລະດັບນໍ້າຍັງເພີ່ມສູງຂຶ້ນເລື້ອຍໆ.
