ຍອດຜູ້ເສຍຊີວິດຈາກນ້ຳຖ້ວມໃນປາກິດສະຖານ ຫລາຍກວ່າ1ພັນຄົນ
ຂປລ.ຕາມຂ່າວຈາກ ອິດສະລາມາບັດ, ສຳນັກງານ ໄພພິບັດ ແຫ່ງຊາດ ຂອງປາກິດສະຖານ ລາຍງານ ໃນວັນທີ29 ສິງຫານີ້ວ່າ: ຍອດຜູ້ ເສຍຊີວິດ ຈາກເຫດ ນ້ຳຖ້ວມ ຄັ້ງໃຫຍ່ ໃນປາກິດສະຖານ ເພີ່ມຂຶ້ນ 1.061ຄົນ ນັບຕັ້ງແຕ່ ເດືອນມິຖຸນາ ທີ່ຜ່ານມາ ເຮັດໃຫ້ພື້ນທີ່ ຜະລິດ ກະສິກຳ ໄດ້ຮັບ ຄວາມເສຍຫາຍ ເກືອບ 1 ລ້ານເຮັກຕາ, ຖະໜົນ 3.457 ກິໂລແມັດ ແລະ ຂົວ 157ແຫ່ງ ຖືກທຳລາຍ ຈາກກະແສນ້ຳ ພັດຮຸນແຮງ.
ນອກນີ້ ຍັງມີ ປະຊາກອນ ໄດ້ຮັບ ຜົນກະທົບ 33 ລ້ານກວ່າຄົນ ກວມເອົາ ເກືອບ 15% ຂອງປະຊາກອນ ທັງໝົດ ແລະ ມີເຮືອນປະຊາຊົນ ໄດ້ຮັບ ຄວາມເສຍຫາຍ ຢ່າງໜັກ ເກືອບ 1 ລ້ານຫລັງ. ຂະນະນີ້ ລັດຖະບານ ປາກິດສະຖານ ຍັງຄົງ ຫາທາງ ເຂົ້າໄປ ຊ່ວຍເຫລືອ ຜູ້ປະສົບໄພ ໃນໝູ່ບ້ານ ທີ່ຖືກຕັດຂາດ ຈາກໂລກ ພາຍນອກ ໂດຍສະເພາະ ທາງພາກເໜືອ ຂອງປະເທດ./. (ພາກຂ່າວ: ຕ່າງປະເທດ)
